ताजा खबर

बेलौरी खबर

सिकलसेल एनिमिया रोगको निदान र रोकथामका लागि बेलौरीमा अभियान सुरु ।।

हरिश चन्द्र बाग, कञ्चनपुर ।
पश्चिम तराईका विभिन्न थारू बस्तीमा सिकलसेल एनिमिया प्रभावितको संख्या दिनानुदिन बढ्दै गइरहेका बेला अन्य समुदायका नागरीकमा पनि यसको लक्षण देखिएसंगै सिकलसेलको निदान र रोकथामका लागि  अभियान थालिएको छ । कञ्चनपुरको बेलौरी नगरपालिका र सिकलसेल एनिमिया एसोसिएसन अफ नेपालको संयुक्त आयोजनामा बैशाख २५ गते मंगलबार बेलौरीमा सञ्चालित सिकलसेल रोग खोज पड्ताल अनुसन्धानात्मक जाँच शिविर सम्बन्धी अभिमुखिकरण कार्यक्रममा बोल्ने अधिकांश वक्ताहरुले सिकलसेलको भयावह अवस्था प्रति चिन्ता प्रकट गरेका हुन् । प्रदेश सभा सदस्य कुलबीर चौधरीले सिकलसेल रोग आमाबाबु दुबैमा भए सन्तान पनि संक्रमित हुने सम्भावना रहेकोले यसको निदान र रोकथामका लागि प्रदेश संसदमा छलफल गर्ने बताउनु भयो । 

 


सिकलसेल एनिमिया एक किसिमको रगत सम्बन्धी वंशानुगत रोग भएको सिकलसेल एनिमिया एसोसिएसन अफ नेपालका अध्यक्ष पीताम्बर चौधरीले बताउनु भयो । “मानव शरीरका रक्त कोषिकामा क्रोमोजोम हुन्छ र त्यसमा जीन हुन्छ, जीन धेरै प्रकारका हुन्छन्, अध्यक्ष चौधरीले भन्नुभयो, जोनमा खराबी आयो भने सिकलसेल एनिमिया हुन्छ ।” नेपालमा यो रोग खासगरी पश्चिम नेपालका बाँके, बर्दिया, दाङ, कैलाली र कञ्चनपुर जिल्लाका थारु बस्तीमा बढी देखापरेको छ । वंशाणुगत रूपमा सर्ने सिकलसेल भएका व्यक्तिमा शरीर, हाडजोर्नी दुख्ने, कमलपित्त, रक्तअल्पता, रिंगटा लाग्ने, कमजोर हुने लगायतका समस्या देखिने गरेको सिकलसेल एनिमिया एसोसिएसन अफ नेपालका अध्यक्ष पीताम्बर चौधरीको भनाइ छ । 

 


औलो प्रभावित जिल्लाहरुमा बसोबास गर्दै आएका अधिकांश आदिवासी जनजाती थारु समुदायमा जनस्वास्थ्य समस्याको रुपमा देखापरेको सिकलसेल रोगको निदान तथा रोकथामका लागि बेलौरी नगरपालिकाले यस चालु आर्थिक वर्षमा रु. ९ लाख ५० हजार बजेट विनियोजन गरेको बेलौरी नगरपालिकाका उपप्रमुख चित्र कुमारी चौधरीले बताउनु भयो । विनियोजित रकमलाई सदुपयोग गर्न अब केही दिन मै नगरपालिका भित्र सिकलसेल एनिमिया रोग सम्बन्धी निःशुल्क चेकजाँच शिबिर सञ्चालन गरिने उहाँले बताउनु भयो ।


राष्ट्रिय जनगणना २०६८ अनुसार नेपालमा थारू जातीको जनसंख्या १८ लाख जति रहेको छ, जसमध्ये पश्चिम तराईँका १० जिल्लामा बसोबास गर्ने थारू समुदायको संख्या लगभग १२ लाख छ । यो रोग थारू समुदायमा मात्रै हुन्छ भन्नु गलत हो । तर पनि यो रोगले थारू समुदायमा भयानक रूप लिएको छ ।  सेती अञ्चल अस्पतालमा कार्यरत ‘सिकल सेल एनिमिया’ फोकल पर्सन यशोदा ढकालका अनुसार २०७१ साल देखि हालसम्म रगत परीक्षण गराएका मध्ये ४२० जनामा सिकलसेल एनिमिया देखिएको र उनीहरुले हाल नियमित उपचार गराइरहेका छन् । “हालसम्म अधिकांश आदिवासी जनजाती समुदायका नागरिकमा यो रोगका लक्षण देखिएका छन्, उहाँले भन्नुभयो, एक जना पहाडी समुदायकी महिलामा पनि सिकलसेल एनिमिया देखिएको छ ।”

 

२०७२ साउन १ गते देखि सिकल सेल एनिमियाका बिरामीलाई १ लाख रुपैयाँसम्म उपचार खर्च दिने गरिएको छ । तर यो रकम पाउने प्रक्रिया भने त्यत्ति सहज छैन । सिकल सेल भए÷नभएको पुष्टि गर्न रगत परीक्षण गर्दा १ हजार रुपैयाँ लाग्ने गर्दछ । रगत परीक्षण पछि सिकल सेलका लक्षण देखिएमा मात्रै सरकारले सुविधा उपलब्ध गराउने गर्दछ । नेपाल सरकारले पश्चिम तराईमा विशेषगरी थारू समुदायमा देखिएको सिकलसेल एनिमिया रोगको उपचारलाई सर्भसुलभ र निःशुल्क गर्ने घोषणा गरेको स्वास्थ्य मन्त्रालयका प्रबक्ता महेन्द्र श्रेष्ठले बताउनु भएको छ । 

 

“सरकारले सिकलसेलका बिरामीको निःशुल्क उपचार गर्ने व्यवस्था मिलाएको छ, प्रबक्ता श्रेष्ठले भन्नुभयो, अहिले बिरामीको रोग पहिचान भइसकेपछि १ लाख रुपैयाँसम्म उपचार खर्च दिने गरेका छौँ ।” स्वास्थ्य मन्त्रालयका प्रबक्ता श्रेष्ठका अनुसार सिकलसेल प्रभावित क्षेत्रहरुमा सरकारले सिकलसेल एनिमिया भएका बिरामीको उपचारका लागि आवश्यक पर्ने रगत परीक्षण गर्ने मेसिन खरीद, स्वास्थ्यकर्मीका लागि तालीम, जनचेतना अभिवृद्धिका लागि हरेक स्थानीय तहमा सचेतना कार्यक्रम गर्ने योजना सरकारले तय गरेको छ । 

<