ताजा खबर

बेलौरी खबर

‘स्काउट अब राजनीति हस्तक्षेपबाट मुक्त हुन्छ’ : मन्त्री विश्वकर्मा


काठमाण्डौ, २० चैत । नेपाल स्काउटका प्रमुख स्काउट एवम् युवा तथा खेलकूदमन्त्री जगत बहादुर विश्वकर्माले नेपाल स्काउट संगठन गैरराजनैतिक, सामाजिक उद्देश्य बोकेको विशुद्ध शैक्षिक अभियान भएकोले सोही अनूरुप राजनीति हस्तक्षेपबाट मुक्त भएर चल्नुपर्ने बताएका छन् । 

 


नेपाल स्काउट राष्ट्रिय प्रधान कार्यालय लैनचौरमा मंगलबार आयोजित छलफल कार्यक्रममा अधिकाँश वरिष्ठ स्काउट गुरु एवम् पदाधिकारीहरुले  नेपाल स्काउट पछिल्लो समयमा राजनीति हस्तक्षेपबाट मुक्त हुन नसकेको गुनासो गरेपछि प्रमुख स्काउटको हैसियतमा मन्त्री विश्वकर्माले सो कुरा बताएका हुन । प्रमुख स्काउट विश्वकर्माले नेपाल स्काउटको प्रमुख स्काउटको हैसियतमा शपथ लिएका थिए । उनलाई नेपाल स्काउट राष्ट्रिय तदर्थ समितिका संयोजक चन्दन कौशिकले नेपाल स्काउटको स्कार्फ लगाइदिएका थिए ।

 


नेपाल स्काउटको प्रमुख स्काउटको हैसियतमा दिक्षा लिएपछि कार्यक्रमलाई सम्बोधन गर्दै मन्त्री विश्वकर्माले स्काउट संगठन यसको विशुद्ध उद्धेश्य र मर्म अनूरुप चल्न जरुरी रहेको कुरामा जोड दिएका थिए । ‘अब नेपाल स्काउट लोकतान्त्रिक मुल्य मान्यता र संस्थागत ढंगबाट चल्ने कुरामा सबैजना ढुक्क हुनुस्’ मन्त्री विश्वकर्माले भने ‘यहाँ राम्रो काम गर्नेलाई मात्रै छुट हुन्छ, नराम्रोलाई होइन ।’ 

 


विगत केही समयदेखि राजनैतिक हस्तक्षेपका कारण धुमल्लिएको स्काउट संगठनलाई यसको मुल मर्म अनुसारसञ्चालनका लागि स्काउटमा आवद्ध सबै पदाधिकारीहरुले स्काउट पोशाकको मर्यादा कायम राख्न पनि मन्त्री विश्वकर्माले आग्रह गरे । देशको विकास, समृद्धि र सुशासनको लागि वर्तमान प्रधानमन्त्री लागि पर्नुभएको उल्लेख गर्दै मन्त्री विश्वकर्माले विगतको जस्तो कुनैपनि क्षेत्रमा अस्थिरता र अन्यौलता नहुने पनि स्पष्ट पारे । अस्थिर सरकारका कारण विगतमा हरेक क्षेत्रमा राजनैतिक हस्तक्षेप बढेको थियो’–मन्त्री विश्वकर्माले भने, ‘अब त्यो क्रमशः अन्त्य हुन्छ । ’

 


नेपालको संविधान अनुसार मुलुक संघीय संरचनामा गईसकेकोले सोही अनुसार स्काउटको ऐन बनाउन युवा तथा खेलकूद मन्त्रालयले आवश्यक प्रकृया अगाडि बढाइसकेको पनि मन्त्री विश्वकर्माले बताए । नेपाल स्काउटको तेस्रो राष्ट्रिय ज्याम्बोरी (वृहत स्काउट भेला) सकभर जेठको पहिलो साता गर्न उपयुक्त हुने गरि कार्यक्रम तय गर्न पनि नेपाल स्काउटका पदाधिकारीहरुलाई उनले सुझाव दिए । 

 


त्यस अवसरमा युवा तथा खेलकूदमन्त्रालयका सचिव महेश दाहाललेविगतको तुलनामा नेपाल स्काउटको नाम र प्रतिष्ठामाकमी आएकोप्रति चिन्ता व्यक्त गर्दै यसको शाखलाई उँचो राख्न सबै स्काउटहरु लाग्नुपर्ने बताए । उनले नेपाल स्काउटका कार्यक्रमलाई अन्तराष्ट्रिय जगतमा प्रर्वद्धन गर्नुपर्ने, पुर्वाधारको विकासमा जोड दिनुपर्ने, संघीय संरचना अनुसार स्थानीय र प्रादेशिक तहमा स्काउट विकास र विस्तार गर्नुपर्ने बताए । 

 


प्राकृतिक विपत्तिमा उद्धारको लागि अघि बढ्ने हातहरु सबैभन्दा पहिला स्काउटहरुको हुनुपर्ने उल्लेख गर्दै सचिव दाहालले यसका लागि हरेक स्थानीय तहमा महिला र पुरुष स्काउटलाई उद्धारसम्वन्धि आवश्यक तालीम दिनुपर्ने बताए । नेपाल स्काउट राष्ट्रिय तदर्थ समितिका संयोजक चन्दन कौशिकले नेपाल स्काउटको विगतदेखि वर्तमानसम्मका विवरण प्रस्तुत गर्दै आफुसहितको समिति नेपाल स्काउटमा दिगो विकास, सुशासन र राजनीतिमुक्त संगठन बनाउन निर्वाचन गर्ने उद्धेश्यले आएको प्रष्ट पारे । 

 


यसैविच वर्तमान तदर्थ कार्यसमितिले ककनीस्थित नेपाल स्काउटको अन्तराष्ट्रिय तालीम केन्द्रमा तेस्रो स्काउट ज्याम्बोरी आयोजना गर्न लागेको , प्रदेश संरचना अनुसारको ऐन बनाउन सातैवटा प्रदेशका वरिष्ठ स्काउटरहरुबाट सुझाव संकलन कार्य गरेको, नेपाल स्कउटको लक्ष्य २०२० अनुसार मुलुकभर स्काउटको संख्या र संगठन विस्तार गर्दै लगेको बताए । 

 

सो अवसरमा नेपाल स्काउटका पुर्वप्रमुख आयुक्त श्रीराम लामिछाने, वरिस्ठ स्काउट गुरु प्रा.गोविन्द नारायण ज्या–पू, राष्ट्रिय तदर्थ समितिका सल्लाहकार डा.रविन्द्रप्रसाद पाण्डे, सदस्य रामकुमार भण्डारी, पार्वती गिरी, स्काउट गुरु हरि बहादुर श्रेष्ठ, तरुण रञ्जन दत्तलगायतले नेपाल स्काउटलाई राजनीतिबाट मुक्त राख्न सरकारी तवरमा आवश्यक पहल गर्नुपर्ने माग राखेका थिए । उनीहरुले नेपाल स्काउटको ऐन जतिसक्दो चाँडो संशोधन गरेर संघीय संरचनाअनुसार स्काउट पदाधिकारीहरको निर्वाचनको लागि बाटो खोल्न मन्त्रीसमक्ष आग्रह पनि गरेका थिए । 
 

<